Wednesday 14 May 2014

رحلة - مع فريد عبدال في مدينة الكويت

نروح للمباركية نفتر بالديرة بس بغالب الوقت بسياراتنا او صناديقنا المكيفة :} سايرنا بهالرحلة المعماري اللي انا جدا معجبة بفكره / فريد عبدال، شخصيا احب افتر بالمناطق لكن ولا مرة افتريت مع احد يعرف بتاريخ المنطقة و العمارة و سوالف لي عنها هالكثر ، بس اذكر طلعاتي مع ابوي الله يرحمه و كان فيها يسولف عن الاماكن او الاشخاص اللي سكنوها و تاريخهم

رحلة مجهود شبابي كويتي حسابهم في الانستاجرام (ru7la@) فيه معلومات عن رحلاتهم، اهم اللي اتاحوا لي هالفرصة اللي اسعدتني بكل تفاصيلها، حتى الحر اللي قدرت اتحمله :} تلاقينا عند سدرة قدام سوق الاقمشة و يم المواقف اللي عند غرفة التجارة، و مشينا لي سدرة سوق التجار عن طريق مجمع البنوك و ردينا من المباركية و على كثر ما رحت لسوق الاقمشة "الخام" و مريت دروازة العبد الرزاق اللي عرفتني عليها ديمة بمعرضها طابوق، لكن عمري ما رحت للحديقة اللي بظهر مباني البنوك اللي يطلون على الدروازة! حديقة صغيرونه يم مسجد و طبعا المستمتع الاكبر فيها غير الكويتيين...

التالي من مقتطفات السوالف ...

صممت مدينة الكويت للسيارات لا للبشر، و تحتاج شعل صحيح و مدروس في المناظر الطبيعية و الزراعة

الفضاء العام مهمل ،، ماكو زرع في اسفلت و طابوق واجد

وجود عامل الأنس و اللطف في الفضاء العام مهم ،، شلون بتمشي في مكان ما يحسسك بالراحة

 الكويت سابقا محصورة بالسور و حاليا الكويت الكبرى تقسمت مابين الشويخ و السالمية

السيارة داخلها تبريد يضمن لك الرفاهية و لكنها ايضا تعمل ك فرن للجو العام، و من هني تبدا الحاجة لموازنة عدد السيارات (مخرجات عوادمها) و النباتات 

سوق الاقمشة من المشاريع الناجحة حتى تاريخه، و تنسيق الاسواق صحيح و توازن المساحات ممتاز داخل السوق، و دليل نجاحة هو ارتياد الناس له 

المدينة الممتازة: هي التي في كل مشهد تراه فيها لا يوجد خلو (فراغ)

مبنى بنك الخليج (سألت عنه لاني احبه جداااا) مبنى قائم على نظام المشربية و يظلل نفسه بنفسه

مرينا حديقة يم مسجد السوق الكبير، مهملة بس جدا جميلة!

و اهم سالفة اهي اللي تكلمنا فيها عن "الثالوث": البصرة الكويت عبادان ،، شنو القصة ماراح اقول :) اللي يبي يروح رحلة مع فريق رحلة 

طبعا الحلو بالموضوع وجود شخص كبير معانا (ابو عبدالرحمن) هم شارك أ فريد عبدال في المعلومات و عرفت وين كانوا ساكنين اليهود و ان الكويتيين قبل كان عندهم نظام لاعادة التدوير! الغريب ان الموضوع طرح و كان يمنا حاوية كبيرة و الزبالة مقططة حولها و مو فيها، مو بس ما عندنا اعادة تدوير هم ثقافة "النظاف" مفقودة ...

لما تمشي على رجولك و تتلفت حولك بتشوف الديرة بشكل مختلف ، حاول ما تتحجج بالحر و افتر لو ١٠ دقايق ، بالمنطقة اللي تعجبك، بس استشعر المكان و الفضاء و الناس :}


No comments: