Sunday, 12 April 2009

العرموطة المتتفتحه





العرموط فاكهة و التفاح فاكهة منفصلة عنها اهم يصيرون حق بعض! بس هم مختلفين، كل وحده لها خوات و تنتشر بعدة بلدان، امس جبت عرموط، و عرموط من تشيلي بعد، الوالده كلت من هالعراميط عرموطة علشان اتجربه جان تقولي

"العرموط اللي جبتيه حلو ،، كليت وحدة و اشحلااااتها جنها تفاحة" سيدا ردة الفعل الطبيعية عليج بالعافيه يما

اليوم و انا اقرم بعرموطة من هالعراميط جان افكر و انا اخز المسكينه المقرومه، الحين لما امي قالت عن العرموطة انها حلوه جنها تفاحة، اهي مدحت العرموط ولا التفاح؟ الحين بما ان العرموط فاكهة مختلفة عن التفاح مو من الظلم ان نشبه طعم العرموط بطعم بالتفاح؟ معناته ان طعم العرموطة اللي كلتها امي مو مميز ولا له كيان قائم بحد ذاته! و يكفي ان طعمها كان يشابه طعم التفاحه علشان ننكر تميز طعم عرموطة امي!

يعني انا الحين في حيرة من امري ،، العرموطه انمدحت ولا انذمت؟

و هالتساؤول ينبع من وحدة اتحب التميز علشان جذيه التشابه "و ان كان الشيئ المشبه به جميل" يبقى خصلة مو جاذبه لي و تحفزني على البحث عن التميز،، يعني اللي بعدو! غير العرموط التشيلي شنو اكو؟ لازم اوصل للعرموط اللي نكهتة مميزه و عرموطية "ان صح التعبير" و انا ادري انه ما يصح بس طوفوها لي



خارج الموضوع و نغزه مقصودة بمناسبة الانتخابات المرتقبة: الحين بالنسبة للي تبونه للكويت، تبون الشي ولا الشي اللي يشابه الشي ولا الشي اللي طعمه حلو مثل الشي؟
:>

10 comments:

Enter-Q8 said...

اخيرا بوست بالعربي
ياااه
حلوة نغزتك المبنية على الموضوع
بالوضع الحالي
زين اذا حصلنا شي يشابه شبيه شي

Q80-Chill Girl said...

انتر

لوول لهالدرجة انا مهملة العربي! بيني و بينك هم كنت مادري عن بلوقي ،، عودة جديدة بشكل جديد ان شاء الله

و الاشباه كثير سلمك الله بس احنا نبي الاصلي و اللي قلبه على هالديرة، و هم بالمره ودي القى عرموط طعمه عرموطي

q8philic said...

lol
relativity :)
it's amazing how the human mind finds a way in solving a problem

and about kuwait
"insanity: doing the same thing over and over again and expecting different results
"Albert Einstein

46 days left

Q80-Chill Girl said...

Philic

Can you believe its been 7 years! man ur old, and im older lol :p

im not optimistic but there are some efforts around the block, don't know if they will pay off, i hope they do BUT the problem is, where are the REAL pears in our community? and preferably from our pears "mentally" close pears that is! why don't they show up? is it that dark out there?

Reality "in q8":
تكرار الفعل مره بعد مره على امل ان الله يغير الحال، و على بركة الله تسير الامور

كويتية :> و ديرتها للأسف تمشي على التواكل والمتخفي بزيل التوكل

Shurouq said...

lol
العرموط تفاح مستحي
العرموط فاكهة ضالة ونطلب لها الهداية

ليش تشترين عرموط أساسا؟

Q80-Chill Girl said...

شروق

I blame our father, he didn't resist the forbidden fruit, its his genes :p

مع هبة العرموط في هالصيف المستحي و اللي ايتدلع علينا :> لا غنى عن الالفونسو!! لا يطوفج! مستوي و ينطر اللي يربيه في مرابع كرشته! المنجا بهالوقت لا تقااااوم

Manal said...

يا حلو النغزة

:)

بومريوم said...

العرموطة اهى تفاحة مسوية رجيم
بس ما ضبط

نون النساء said...

نبي الشي الزين

والزين مفقوود يمج

اذا يات عالعرموط ترا زين ومفيد

وهم التفاح بعد حتى لو تشبيه



بس اللي عندنا عرفج
ينفع بس حق شب النار


:)

Q80-Chill Girl said...

Manal
:p
انا مستجدة بعالم الهمز و اللمز و يسعدني ان اول محاولة كانت ناجحة

بومريوم
انا احتج! كلامك مبطن و يحمل العداء لمن ترفع راية الرجيم، اطالب باعتذار لمجلس العراميط و باجر فرعية اللي من تشيلي و يحميهم واحد قاعد يطحس بالغباء! دير بالك من نتايج هالتصريحات الغير مدروسة يمكن يقاطعون بيتكم العراميط او يمكن يهاجمونه

نون النسوة
صاحبة اجمل رسمة لبنية كيوت و لابسه عباة ،، ابداع فوتوشوبي:> مقلة بالتعليق عندج بس تصميم بلوقج عجيب ناهيك عن المزاج الرايئ و الالحان الهادية

نرجع لموضوع العرفج، عجبني هالتشبيه، صاجه و الله ربعنا عرفج و لا جبريتهم منهم و فيهم