Not in the mood!

I am still sad, I miss our Amir may his soul rests in peace

عمري 25 و حكم الشيخ جابر امتد 27 سنه، من وعيت و اهو اميرنا، تربينا بالمدرسه على الاغاني الوطنية و تعلمنا انه بابا جابر مو بس أميرنا الشيخ جابر. تميت اقول بابا جابر لي الحين لانه فعلا ابو،، ماعرفته شخصيا فما اقدر احكم بس عرفت تواضعه و طيبته مع الكل، احلى ما فيه حساسيته لما وقف بالازمه بمجلس الامن علشان يناشد العالم و يشرح قظية اغتصاب ارض و تشرد شعب دمعت عيونه، دمع الكويتيين كله تلخص بهالدموع كلنا بجينا بوقتها. احساس قاتل بالظلم و القهر، و مع جذيه تمينا متمسكين بايماننا ان الكويت بترد و اننا على حق

استغرب من اللي بعد موته يستغلون غيابه لتشويه صورته، صحيح محاوله فاشله بس فعلا حسيت اننا بغابه او بالاحرى صحراء فيها ضباع تتحرى الجثث علشان تاكلها، بس الحمد لله حامض على بوزهم :) الكويتيين فيهم خير

ما بقى لنا الا الدعاء له بالرحمه و اللي فيه خير يدعي بينه و بين ربه لهالشخص الطيب اللي كان لنا ابو و امير، الحياة بتستمر اكيد بس ترى هذا اهو الوقت اللي يحتاج فيه المتوفي لحبنا اللي نتغنى فيه بحياته الحين الوقت اللي المفروض نظهره