257 : Skoda

My day with the Skoda Superb...

بما انها السيارة المتوفرة في ذاك الوقت خذيتها، و يقولون ان هذي الفل اوبشن ٦-سلندر! بس الواقع شي ثاني، صحيح الكشنات جلد بس اتحس انك قاعد على كرسي حديد بس املبسينة جلد عن الفشلة، و قلت يلا يا بنت شيهم الشكل و المظاهر فيه، اهم شي المكينة و الأداء. و اثبتت لي السكودا ان قوانين التسارع لا تنطبق عليها! يعني اذا دست ما يهم الزمن اللي تستغرقة الدوسة اهي بتدوس لما اهي تبي لما يصير لها مزاج تسرع الزمن و البانزين اللي قاعده احاول اضخة للمكينة مالهم اهمية، يعني كنت ادوس و متهيئة نفسيا ان ٦-سلندر بتعطيني دوسة محترمة و استجابه متوسطة لي سريعة ،، لااااااا هيهااااات لوول مكانك راوح اللي قمت اخز العداد انطر متى يتحرك و اصك ال١٢٠ ،، و اتوقع اللي كان وراي كرهني و من هذا المنبر اعتذر لصاحب اليوكن الاسود صدقني ما كنت بدش حارتك لو ما صار جدامي الباص اللي كع بريك

بعدين لما اتدوس و الاخت سوبرب تستوعب ان سرعتها زادت، تستن بهدوء *فيها حسنة* لكن فيك خير كع بريك بس خلاص خسرت كل قوة الدفع لا تحاول و تفكر اتم بنفس الحارة و اتدوس مرة ثانية! لا تضايق خلق الله و اسحب نفسك للحارة اللي على يمينك و انطرها تحن عليك و تستجيب لدوستك بعدييييييين فكر اترد لليسار

بس شحليلاتها مجكنمة، جنها صندوق بس مافيه زوايا؟