موقف حلو

بعد الدوام كان عندي مشوار و اتصل فيني اخوي خلال هالمشوار يبيني اساعده بمشواره (احس جني اقول لغز؟!) المهم قلت له اوكيك على ما انت تكون خالص وتحتاجني،، بروح للبانزين

رحت محطة أول مره امرها بحياتي او يمكن مريتها بس من دهر! و مو بنفسي يمكن مع احد من الاهل!! المهم اهي على الدائري الرابع دخلت و كنت مشغوله بين التلفون و اني اركز جم رقم المكينه اللي صب لي منها اللي يشتغل هناك علشان لا انسى و افشل عمري كالعادة! و خلصت التلفون و طرشت مسج طلبتها رفيجتي و قاعده افكر اول ما اطلع من المحطة شلون بوصل لاخوي لان الشويخ لووويه!! و وصل دوري

بدون شعور الحديث المتعارف عليه

انا: *مديت المبلغ* رقم 12

الكاشيير"و كان مجهز الخرده! اشدراه اني بطلع 5 مادري؟" قال و اهو يعطيني الخرده: اختي عفوا ممكن سؤال اخويّ بس لاتفهميني غلط

انا "مصدومه و مبققه عيوني @@ مو متوقعه شي افكر اقول إي يمكن بيسألني عن السيارة؟ لان الصبيان يحبون السيارات؟!": خير؟

الكاشيير: ابتسمي اختي، ماكو شي بالدنيا يسوى

انا "ابتسامه مصدوومه بس من الاذن لي الاذن": ان شاء الله،، مشكوور

*احس وعاني اني فعلا مشغوله بهالاشياء اللي عندي و مو قاعده ابتسم!!*

و مااعتقد اكو يوم بحياتي بيخليني انسى هالموقف، لانه بدر من شخص لا اعرفه ولا يعرفني ولا اتوقع عمره بيعرفني انا حالي حال اللي يمرون عليه بالمحطة كل يوم ، بس اول مره شخص مجهول تماما ايتجرء و يكلمني و يكون له تاثير حلووووو مثل هالشخص، صج صج قعدت ادعي له من قلبي عسى الله يوفقه و يخليله للي يحبونه و يعطيه على قد نيته و يسعده كثر ما خلاني مستانسه

حلو انك تقابل انسان و فجأه بشكل ما تتوقعه، حلو انه يجدد ثقتك بالناس اللي ماتعرفهم و حلو انه يقدر الابتسامه لمجرد الابتسامه مو لاهداف ثانيه

من صار الموقف و انا امشي و اسولفه لخلق الله و مستاااااااااااااااااانسه ،، الدنيا بخير