I got BB'ed

Pic from GSM Arena

و دخلت دائرة الهبة مع تزايد اللي حولي من مستخدمين البلاك بيري، لحد الحين ما كملت اسبوع استخدام، التقالم نوعا ما عسر اول يومين بس بعدين ايدي خذت على الكي بورد، اللي صدمني اهو بساطة و بدائية القوائم الداخلية للجهاز! شكل قوائم سوني اركسون افضل و متقدم بشكل اكبر، توقعت اكثر من هالتلفون و انهم يكونون تعبانين على شكل القوائم و سهولة استخدامها بس لقيت انها القوائم نوعا ما متخلفة عن باقي التلفونات. للعلم سوني اركسوني القديم يكفي و يوفي الغرض لاني استخدم التلفون علشان اتصل و اطرش مسجات و بس! و كلش ما فكرت اني ادش هالهبه او استخدم تلفون فيه مميزات اكثر من انه تلفون

اول يومين جني شااااااايب اخز الكي بورد و اطبع حرف حرف و انا احاول استوعب هالتكنولوجيا اللي جدامي و احاول أأقلم اصابعي مع الدقم الصغار، و كل ما علمني احد شغله انبهر بشكل عبييييط!! طبعا الكل يعلمك بالمسنجر مال البلاك بيري :> غيره تقريبا مجهول لغالبية المستخدمين يعني لما سألت عن شلون ممكن اغير بشكل القوائم و عن الثيمات و هالسوالف محد عنده فكره لوول كل من لاهي بالمسنجر و ارتكاز الاستخدام عليه

فيه خيارات و فيه خيارات حق الخيارات و فيه خيارات حق الخيارات داخل البوك و خارج البوك لوول! مع الجهاز بوك علشان يحفظه و بكل بروفايل اكو خيارات لصوت التلفون خارج هالبوك و داخل هالبوك، و في خيارات لصوت المسنجر و خيارات لصوت المسج من المسنجر "و كل وحدة في لها قائمة جزئية منشقة عن القائمة الاساسية"، هم لصوت الرسائل النصية، رسائل الوسائط ،، الخ الخ

و على الرغم من ان كل هالخيارات تتيح لك مجال بانك تخلي توتك السودة اكثر خصوصية و تميز الا انها نوعا ما مملة و مزعجه! بس بما انها شي تسويه مره وحده نبلعها :> بس شي يعل القلب

حسيت الجهاز يقولي:

رنة المسنجر: بالبوك
شنو تبين الرنة؟
جم مره يهتز الجهاز؟
تبين صوت ولا بدون صوت؟
تبين الجهاز يقوم يكفخج لي اشتغل المسنجر؟

رنة المسنجر: برا البوك
شنو تبين الرنة؟
جم مره يهتز الجهاز؟
تبين صوت ولا بدون صوت؟
تبين الجهاز يقوم يكفخج لي اشتغل المسنجر؟

خلصنا منها!! عبالكم افتكينا :> لا طبعا

رنة المسج لما توصل بالمسنجر : بالبوك
شنو تبين الرنة؟
جم مره يهتز الجهاز؟
تبين صوت ولا بدون صوت؟
تبين الجهاز يقوم يكفخج لي وصل مسج بالمسنجر؟

الخ الخ الللللللللخ

خلصنا من البروفايلات اتجهت لاهم خاصية! المنبه، اللي اعتمد عليه بشكل كلي من التلفون علشان يقعدني للدوام، اكو منبه واحد وتحدد اذا تبيه يشتغل ايام الاسبوع او اليوم بس او ما تبي! المشكله انه ما يتيح لك انك تخلي اكثر من منبه مبرمج، تلفوني اللي قبله كنت مخليه لايام الاسبوع منبهااااات "نومي حيل خفيف كما الريشه" و منبه للجمعة و السبت ، فقدت هالخاصية معالتوتة السودا! بس للحين قاعدة استعمل تلفوني السابق كمنبه و اهي خاصية حلوه بالسوني اركسون حتى لو مافيه كرت اذا متبرمج على وقت معين للتنبيه ايتم يشتغل عليه، بس الوضع مو أزمه يعني :) ما اقدر اقول انها علة جايده ، العلة المنيووووووووز مالت التلفوووون عسارة مو طبيعية! ولا البلوتوث هذا قصة ثااانيه، و للحين ما تفرغت اني اشوف برامج اتسهل هالسوالف بس لي جدام بدور و علشان جذيه مابي اطول بالحش فيه :> ليما احس اني عرفت كل ربعة فيه و استخدمت كل شغله فيه

الرسائل النصية

واجهة التعامل مع الرسائل النصيه حسستني اني ابي ابجي! بالضبط قاعدين نقارن ملف "تكست" بسيط مع ملف "وورد" لمعالجة النصوص! ماكو مقارنة كلش ما بين تلفوني السابق و هالتلفون فشل بشكل كبير في شكل و ترتيب الرسائل النصية

عندي سوالف واجد عن تجربتي مع البلاك بيري و للحديث بقية فيما بعد