Thursday 13 November 2008

علي الراشد - قناة سكوب

تو خلص اللقاء مع النائب علي الراشد على قناة سكوب، ادار الحوار الفضلي و الهاجري

يمكن انا تابعت من عقب ال١١ بس عجبني الراشد اللي حسيته فعلا يعبر عن اللي اتمناه باي عضو يمثلني، فهو يملك الوسطية الكويتية اللي تعودنا عليها و حبيناها، يخاف الله و بنفس الوقت يطبق الديموقراطية، و هالشي بالنهاية يعكس واقعنا باننا مسلمين و نحتكم بدولتنا للدستور، كلامه طيب و بسيط و انسان شفاف، عسى الله يوفقه

الهاجري، صمت دهرا و نطق كفرا، غير صوته اللي كان يزعجني مداخلاته و اسئلته اللي مادري شلون قايله، مادري شلون مذيع و يقاطع ضيفه لما يتكلم؟ مو من ادب الحوار انك تنصت؟ ناهيك عن استنزاف اللقاء بانه يعيد و يزيد على موضوع ازالة التعديات على املاك الدولة "الدواوين تحديدا" بدون محاور جديدة تعالج هالجانب و بدون التطرق لمشاكل اكبر، مستهينيين بسعر برميل النفط انه نزل؟ مو حاسين ان بعد جم سنه على هالمعدل ماراح يكون عندكم فلوس تبنون فيها محكر حمام "الله لا يقووله!!" ناهيك عن دوانية تكلف على حد قولهم ٢٠-٤٠ الف دينار!

سألوا ليش الدواوين، و اكد الراشد انه ضد كل التعديات
بعدين ليش مو الشاليهات، رد الراشد انه ضد كل التعديات
ليش دواوين الناس اللي ماعندهم مساحة، رد الراشد انه ضد كل التعديات و تم تطبيق القرار على الاعضاء و الوزراء و الشيوخ قبل عامة الشعب لانه ماكو فرق بينهم بهالقرار، لان الاصل ان هالاراضي حق للدولة

اذا كانت عند هالمذيع و غيره من المتصلين مشكلة مع المناطق اللي تطبق عليها القرار قبل غيدها خل ايتكلمون بصراحه و لا يلفون و يدورون و يخلون الادمي يعيد و يزيد بكلامه اللي انا مليت و حسيت اني اشوف اللقاء يتكرر

و بعدين المتصل اللي يقول للراشد اكو خيمه ابيت جارك، اولا انا بخبري ان الخيمه ما تعتبر مخالفه لانها مو مبنيه! ولا اهي من طابوق و مبنيه او كيربي؟ مادري الله اعلم لكن ما علينا من هالنقطه و نحتسب ان هالجار مخالف و متعدي على املاك الدولة

احنا مو ناس؟ مو كلكم راع و كلكم مسئول عن رعيته؟ ليش ما المتصل دق على اللجنة و اذا اللجنه ماردت عليه او تجاهلته خل يشتكي للراشد

و مع العلم الراشد وضح انه ما عرف اي بيت من بيوت جيرانه اهم يقصدون بس وجه رسالة واضحة عبر قناة سكوب للجنة المختصه بازالة التعديات! و معروف وين بيتهم فيه و قال وين بيتهم فيه زيادة تاكيد! و هم ما عجب المتصل و انتهى اتصاله بكلام زعلني

الصج، حز بخاطري لما شفت رواسب العنصرية المقيته لما طلعت على السطح و قام ايتغنى فيها المتصلين، و صرنا بدو و حضر و صار فينا من له دم ازرق و دم احمر، و الله عيب هذا يكون مستوى حوارنا كشعب، وين الكويت؟ و ليش فجأه ماصرنا كويتيين؟ اللي حاس انه مظلوم خل ايتكلم و يوضح الظلم مو يقول اييي لاني ولد فلا مو ولد فلنتان انظلمت! خلونا نتكلم برقي علشان نحرج هالعنصرية النتنه و نخليها تطلع من عقولنا و كلامنا

12 comments:

enter-q8 said...

اهم شي انه قال انه خرج بره التحالف
هههههههههه

Q80-ChillGirl said...

هذا احلى ما سمعت بهاللقاء
:)

Eng_Q8 said...

حسافه ما شفت المقابله

بنطر الاعاده

Organic Kuwait said...

ali al rashed gives me hope.

EXzombie said...

متى الاعادة و جم التردد مال قناة سكوب

و مذيعين هالايام زايد عندهم جين الثوارة الوشيحي من صوب يدق على واحد علشان يحرج المليفي و الي يدقون عليه يدقرهم و يمتنع عن الاجابة، شكو داقين عليه ما ادري

ودي يوم يطلع لنا واحد يزفهم بالمقابلة

بس اعتقد انه قناة العدالة استحوذت على حصة الاسد من الثوارة مع مذيعينهم او بالاصح بدلياتهم الي لابس هدوم، ما شفت ناس تقط بدليات بهالطريقة او الكمية، يعني لو هندي و نقول له تكلم كويتي ما يخربط بالحجي كثرهم

و تبا لمذيعي البدليات

Q80-ChillGirl said...

Eng_Q8

المقابلة تستاهل المتابعة على كثر ما تنرفزت الاان علي الراشد بين معدنه
:) و الايام و الافعال بتحكم عليه

Organic Kuwait

Very true! and that is how I felt when i saw him :D

EXzombie said...

و حسافة طلع من التحالف

الوتنيين الحين شراح يسوون؟

Q80-ChillGirl said...

EXzombie

ماعندي معلومات في الوقت الحالي بس ان شاء الله اذا حصلت شي بطرش لك ايميل بوقت البرنامج و تردد سكوب

و تبا للضحاله و انت الصاج

و كل ما قريت تبا لشي يذكر علي مبتدئ

Miemie said...

النائب علي الراشد احد القلائل اللي ينطبق عليهم "قول وفعل" مو مثل الاغلبية العظمى بالمجلس "قول وفول!!!" بس عندي سؤال: ليش زاد عدد نواب التحالف اللي يطلعون منه؟
بس اعتقد هذي مو اول مرة يعلن فيها الراشد خروجه من التحالف

Q80-ChillGirl said...

Miemie

صاجه و ان شاء الله افعاله بتشهد على كلامه

و بالنسبه لخروجه اهو دم استقالته برمضان تقريبا او قبله بشوي و قال انها معلقة و تدخل ناس محايدين بينه و بين التحالف و انتهى الموضوع على انه يطلع من التحالف

و كان بالتحالف او خارجه احلى مافيه انه يفكر بالكويت
:)

و اعتقد خروجه له مؤشرات كثيره :) و الايام كفيله انها توضح ماية كل واحد

q8philic said...

يامعودة هذي اشكال مذيعيين
لا والفضلي الحبيب صدق انه اعلامي
ملاحظة: ماشفت اللقاء بس غاثيني المذيعين

Q80-ChillGirl said...

Philic

اشاركك الانغثاث، مشكلة اللي بسكوب كللللللهم انهم يطبلون و يسوون دعاية لسكوب! المفروض هالقناة تفرض نفسها بالمادة الاعلامية اللي تقدمها مو بدعاية مذيعينها

تدري عاد احس الفضلي يجي منه خير؟ احس لو تدرب صح ممكن يصير مذيع زين