Sunday 20 March 2011

ليش ما افتخر في ملتقى كويتي و افتخر؟

لكل منا سيئاته و حسناته، افراد / احداث / وقائع، الوصول للكمال في اي شيئ مستحيل ،، و يكفينا ان يغلب الزين على الشين لنقول بأن شيئ ما "زين" او العكس .. كويتي و افتخر ملتقى سنوي يستمر للعام الرابع على التوالي لم اتطرق له بالمدونة من قبل لكن دار عبر السنوات محاورات و احاديث حول ما يحويه هذا الملتقى و كنت بين مؤيد و معارض لما هو مطروح ، قررت ان اتحدث من واقع الصور لما رأيت في كويتي و افتخر


وصلنا قاعة ٨ و الحضور كثيف


هيصة و تزيين و الوان تمزج ما بين الماضي و الحاضر


كنت مستانسه على جدور الهريس المعلقين بالسقف الوانهم اتشوق
 

اول زيارة لبوث خواتي و صديقاتهم، مجموعة "اهتم و شارك" التطوعية
مجموعة تطوعية غير ربحية ابتدأت مشوارها في عام ٢٠٠٧ و في صفحة الفيسبوك اعلاه معلومات وافية عنهم .. زيارتنا كانت للمساندة و التشجيع ،، و بعدها قررت افتر

و اكثر شي شدني اهو هالربعة اللي مصورينها فيصل البشر و جمال الايوبي ،، و اهم من ابرز المصورين الكويتيين و اعرف عنهم من فلكر و مشاركاتهم بالمعارض التصويرية ، الاثنين مبدعين ما شاء الله


صور بالحجم الواقعي ل٣٠ شخص! الرابط بينهم انهم كويتيين ،،، و متميزين
كل واحد من هالاشخاص رفع اسم الكويت بمحفل عالمي او مسابقة عالمية تميز و ميز معاه ديرته و اثبت ان فيها خير
كل واحد منهم رفع راسي و اسعدني بانجازه اللي ما عرفت عنه الا من هالملتقى و قلة منهم عرفت عنهم من خلال الاعلام 
كل واحد من هالاشخاص وراء ابراز صورته جهود من المنظمين لمتقى كويتي و افتخر
كل واحد منهم خلاني ابتسم و انا اقرا انجازه اللي انكتب في لوحة تحت الصور و اعتذر اني ماقدرت اصور بشكل واضح لكثرة الناس و لكني بحاول اني احط نبذة عن كل واحد منهم بعد ما تم التواصل المنظمين علشان اخذ نسخة من النبذة اللي انكتبت عن انجاز كل كويتي انحطت صورته بهالربعة ، و هم بحط الدعاية اللي تشمل هال٣٠ شخصية اول ما اطيح على اللنك مالها



و هذيلا ٧ منهم على سبيل المثال


لوحة الاسماء من بعيد اللي و انا اقراها احس بوناسه ما اقدر انقلها، افتخرت بكل واحد فيهم .. و اهم شي حركة نابوليون بونابارت توني استوعب لماحطيت البوست

و هالنجدية بوسط المعرض مثل غيرها من الاشياء التراثية اللي كانت و بعضها لازال ،، لمسات في الديكور حديثة و ملفتة للنظر


كملت ووصلت لبوث نجود بودي رحمة الله عليها، مصممة الازياء الكويتية اللي توفت بعد صراع مع مرض السرطان ،، و هالكب كيك اللي يبيعونه يروح ريعه بالكامل لبيت عبد الله المخصص للاطفال مرضى السرطان ،، اكو "كب كيك" لهدف خيري مو بس للربح

البلوزة اللي صممتها المرحومة للأسرى الكويتيين


عطرها ،، شهادة لها ،، و اسمها في كتاب عالمي ،، كويتية و ليش ما افتخر فيها؟


جانب من تصاميمها و اعمالها الفنية ،، كويتية و يحق لي افتخر فيها ،، راحت من هالدنيا بعد ما خلت لها بصمة


بصراحة مادري شنو هالبوث لكن عجبني فنهم في رسم الكلمات و للاسف ماكان احد موجود حزة ما مريت ولا جان سألتهم شنو قصتهم ،، لكن سعيدة اني خذيت صورة علشان اقول اكو فنانين في كويتي و افتخر ،، ليش ما افتخر فيهم؟


مشروع "ري يوز" اللي صار له معرض من فتره و كان عبارة عن عدة منتوجات من مواد تم استخدامها ،، ليش ما افتخر بالكويتي اللي يحفزنا على اعادة التصنيع و الاستهلاك؟ و ليش ما استانس بمشاركة غير الكويتيين في هالمشروع؟ مثل بيانكا صاحبة مطعم ايرلي بيرد؟

و يم هالمشروع كان بوث بيت عبد الله ،، و بوث الأمل المختص بانشطة المعاقين ،، و بوث مسوينه بنات بفكرة بسيطة و بيعلنون عنها بالتفصيل بعدين و الفكره عبارة عن لوحة بيضاء تبصم و توقع فيها اذا بيوم من الايم ضاق خلقك! ،، و بوث لتلفزيون نايس كويتي اللي ابدع في اليوتيوب و جمع لنا جواهر من ارشيف الكويت الاعلامي ،، ليش ما افتخر فيهم؟ ،، و بوث الفنان اللي يسوي من الصلصال على شكل وجوه الناس اللي يمرونه؟ وولده سوا لخواتي انجري بيرد صغير؟؟ و بوث للمركز العلمي و بوث للنادي العلمي و شنو ما افتخر فيه بين هالمشروعات؟ و غيرهم كثيييييييير بس ما سمحت لي الزحمة ولا الوقت اني اصورهم

نعم فيه ازياء  و ديكور و تصوير و كب كيك و كاكاو و حلو و قهوة و عصاير و كورن دوج و بافلو وينجز و سوشي و كل ما لذ و طاب ،، مشروعات تجارية مختلفة منها اللي مبتكر شي جديد و منها اللي يقلد .. و ليش ما افتخر فيهم؟

بعد ما كان شيئ شبه مستحيل ان الكويتية او الكويتي يوقف و يبيع شغل ايده اليوم بكل فخر يوقف و انتفت فكرة ان اللي يبيع شغلة محتاج ماديا و ابرك له يجابل مكتب و ياخذ معاش اخر الشهر او يشتغل عند اهله، ما نفتخر بالكويتي اللي تغير فكره و بدا يعتمد على نفسه؟

و هالمشاريع التجارية ما ازدهرت الا بطلب من السوق المحلي، احنا نستهلك شغلهم ، ولا جان ما تموا ، فلا ننتقد شي احنا كشعب قاعد نغذيه بثقافتنا الاستهلاكية ، و لمن يحمل فكرة ان هالبيع من مجهود عاملين لصاحب المشروع اقول كل مشروع يبلش بشخص لابد انه يستعين بغيره علشان يستمر و يكمل. خير و بركة بدينا بهالمشاريع الدور الحين على اللي يبي انشطة علمية و فنية و ثقافية و مبتكرة انها تزيذ انه يبادر و يشترك بكويتي و افتخر و غيره من الوسائل اللي ممكن يتواصل مع الجمهور فيها علشان ينشر فكرته و فنه بدال ما انتحلطم، خل انجرب اننا نفعل، مثل ما سووا المجموعات الخيرية والمشاريع الفنية و العلمية

نعم الصورة ليست كاملة فهناك من لم يبتكر و لم يبدع و لم يصمم بيده ، لكنهم بمنظوري قلّة و الدليل الامثلة التي طرحت و صورت من الكثرة التي لم اشملها و اعتذر اني ما شملت كل هالمجهودات الجميلة اللي خلتني افتخر بكل كويتي ساهم فيها

اللي يبي الفن و الاعمال الخيرية و التجارية المبتكرة و يبي يفتخر بالكويتيين يقدر و في ملتقى كويتي و افتخر تقصير لكثير من المسافات بهالمجال و اللي يبي يشوف كب كيك و بس هم يقدر 
:)

شنو تبي تشوف و بشنو تبي تفتخر؟ روح لهم و شجعهم و انشر ثقافتهم .. اذا مو هالسنة السنة الجاية

6 comments:

Aurous said...

9a7 lsanch

wallah 7ady mt7asfa eny ma r7t

Q80-ChillGirl said...

Aurous
لا اتحسفين :> اكو فرصة ثانية السنة الجاية ،، و اعتقد ان هالملتقى كونه شبابي و سهل التواصل معاهم، نقد نوصل لهم صوتنا بتقديرنا للمواهب الكويتية و الابداعات الكويتية اللي صج نبي هالملتقى يبرزها

LunarDream said...

you didn't drop by!! :S

Q80-ChillGirl said...

LunarDream

I know I'm very sorry about that, both days I came was tight in time, again I apologize :) and hope to get more info :D check ur dm

Touché said...

Interesting review as usual :)

Though at the first glance of the title I had the impression that it's a negative review of the exhibition. I thought it was like "why I'm not proud of P2BK" as opposed to "Why shouldn't I be proud of P2BK" :p

I guess if it was
"وليش ما افتخر في ملتقى كويتي وافتخر"

instead of

"ليش ما افتخر في ملتقى كويتي و افتخر"

then I'd probably wouldn't have assumed it wrong :p

Q80-ChillGirl said...

Touché
The EXACT wanted reaction :} I wanted to attract the -ve reviewers of the event, seeking a backup, to show them a tiny hint of what +veity was there :>