The best Falafel Bu6a6 Sandwich in Kuwait [Review - Nwarah Al-A9li]

نوارة الأصلي - السالمية شارع سالم المبارك "شارع الفنار على تسميتنا

في بداية الأمر قررت اني اطلب منه لانه كان قريب و قلت زلقة بطيحة! خل اخذ جرعة فلافل بطاط، و بالفعل وقفت عند المطعم المطل على شارع سالم المبارك مباشراً و يم مجمع مريم، و على الرغم من انه اكو داعوس بين مجمع المطعم و مجمع مريم لكن فضلت اني اغامر و اعيش تجربة الفلافل بطاط الكويتية الحقيقية و اسفط على الشارع العام!! و بدون فلشر "يعني قوية" بس بعدين راحت السيارة اللي وراي و خفت على سيارتي ، شبيته.

و وصل الجارسون و قلت له ابي فلافل بطاط لو سمحت

الجرسون: عاوزاها بحوموص ولا طحينة يافندم

انا: *في حيرة من امري بس قررت اني اخذها اوريجنال* لاء لو سمحت ابيها بطحينة و سلطة، و لو سمحت عطني درزن فلافل

علشان اعاين الفلافل صح

و بعد ربع سااااعه وصل الطلب

و بسرررعة بطلت الصمونة بالسيارة طبعاً علشان اكلها صح على الطريقة الكويتية الخيشية شكل الصمونة كان دائري و صدمني هذا الشي! انا توقعت صمونة طوالية! مو دائرية بس حسيت انه تغيير حلو

و بالداخل كانت المكونات ، و الصورة الفنية خذيتها بمساندة اختي، و ترددت اني انشرها بس حسيتها معبرة عن المكونات الحقيقية بشكل صريح وتقدرون تشوفون ان البطاط فاتح و مو مقلي حيل و هذي الطريقة اللي يتميز فيها هالمطعم و فلافله خفيفة وفاتحة

وقررنا نقرم فلفولة علشان نشوفها و نستمتع بطعهما خالي

التقييم

انا شفت ان فلافلهم ماصخة و بهاراتها قليلة، بالإضافة الى ان الجرسون ما تشرشح من شارع لي شارع علشان يوصل لي لان الموقف متاح يمهم، ماكانت الخطورة بالموقف عالية كفاية، فلافلهم اقدر اقول ميديم رير، و البطاط كان فاتح بزود يبيلة قلي، بالنسبة للتقديم كان جيد و لكن الصمونة خلال الاكل سرعان ما نشفت اطرافها، تناقص الاكسجين كان عالي و هذا يحتسب لهم بس مخي ما قفل بعدها!؟ الشئ الذي من شآنه تقليل توافق الصمونة مع ماي ستاندردز

all in all

I give it 2/5