Tuesday, 3 June 2008

البنشرجي ،،، و انا

مادري شلون بس حسيت ان هذي الكور البيض اللي على الارض صوتها عالي بزياده و جنه سيارتي تمشي على صخر للحين مو مستوعبه ان اكو شي غلط و اقول شكل السياره يبيلها وزنية بعد، و انا في ربوع الجابرية ستي اللي نلقى فيها كل اللي نبي، وقفت عند المكتبة كجزء من مشواري و اول ما نزلت و جيكت على السيارة انصعقت ان سيارتي امبنشره!؟ اول مره بحياتي اجرب البنشر :} بس تصرفت ببرود و جني ما شفت شي دشيت المكتبة

و انا قاعده اختار اللي دشيت علشانه ولا ابدى استوعب! الحين انا قاعده اتسوق اشماله مو ملقيه سيارتي بال! و قمت افكر، ادق على خدمة الطريق؟ ولا اهلي قبل؟ مادري شلون خلصت من المكتبه

اطل ولا تايري معقول مو حيل منفش وفيه هوا للحين ،،، كنت احاتي الرنق لايصير له شي و ادق على خلق الله كلهم و محد معبرني اللي مغلق و اللي ما يرد نايم و اللي مشغول بالدوام ما يرد صكت فيني الدنيا و انا بروحي ،، قمت افكر

اذا كلمت خدمة الطريق و نطرتهم بتم على اعصابي و بينقعوني بينما لو مشيت اقل من كيلو متر واحد اوصل البنشر! فقررت اني اروح البنشرجي لاول مره بحياتي بروحي :> و شغلت هالفلشر و الله ستر ووصلت على خير، العموم ذكور فا الخز مو طبيعي، كان ودي اقولهم يعني شنو جايه اتمشي؟ لوما هالتاير المنفش ماشفتوا وجهي، اوكي انا شي غريب بينكم بس تعايشوا مع الموضوع انا ما اعض

و نزلت ولا اخ ظريف كاشخ اب روب الدكاتره فوق البلسوت و قاعد على غنفة جلد مشققه قلت له

لو سمحت تايري مفشوش منو يساعدني

بدون كلام اشر لي بايده على اللي يبدل البنشر بكل ازدراء و كآن هالشي مو من قدره و يا حليله هالهندي بو جبهة عريضة و شعر كثيف "عنده سوء توزيع بالثروات" اشر لي اني انطره لما يخلص و ماطول ،، جاني و انا ايكون اللي افهم مبطله الدبه ابي يحط السبير سيدا و يخلصني و لما بدا ايفجج الرنق نشفت ريججججججه و انا اقول له شوي شوي على الرنق يعطيني نظررررة قتاااله يقول فيها "عليمية " و بوسط العملية يوقف الجهاز اللي يبطل البراغي بسرعه اللي انا معجبه فيه و الكشره من الاذن لي الاذن تقول انا مخترعه هالشي اللي جنه درل بس حق براغي

شوفي ماما! "و يروح صوب السبير بالدبه و يطلع برغي يلق" شوفي هدا ما ايجي! تاير ما يوتلاع!!

انا : اهاااا هذا نفس السكيورتي حق التاير

الهندي: "يهز راسه بحسره" اي هدا ميشان قوفل هق تاير

انا: مبهوووووووووره جني اشوف مركبة فضائية

خذا التاير و قام ايسبحه بماي و شوي ولا يشلع منه شي وشوي ولا ايرد يدعس شي و شوي ولا يرد ايسبح التاير، و انا منصدمه و عبالي اني فطحل "انزين ليش ما حط السبير و بعدين اخواني يعابلون بالتاير؟" ولا يرد واهو ايدربح التاير و لا يقولي

الهندي: شوف ماما هدا انتا تاير فيه موسمااار انا يتلع موسمااار هتي تيوب و سوي رقعه، شوف " و يراويني شي برتقالي مخرب شكل التاير" قلت

انا: انزين ليش ما تحط السبير؟ قط هذا

ولا تقووووووم القيامه و تعصف الرعوووود و يشتط الهندي و شوي عيونه تطلع من مكانها

الهندي: لااااااااااا ماما هدا تاير زديد "مع حركة الايد نفس مسلم البراك"! انا يسوي شوغل زين هدا تاير مافي شي فاجد زين

انا: "شوي و الزق بالسيارة اللي وراي" ان شاء الله خلاص حط اللي تبي عادي لو بدون تاير

و لما خلص كل هاللوية خلال ١٥ دقيقه يا حليله قلت له بجم؟

انا هنيه خيالي يجنح و يسبح قلت ها ب٥ و لا يمكن اقل لانه بنشرجي جمعية؟ سألته بجم؟

الهندي : هدا سوي رقعه و هتي تيوب

انا مو مستوعبه بس اقول اي يعني هذي اشياء غاليه

كولووه ٧٥٠ فلس

انا !! @@ لااه

"بقلبي اقول لو انا مبدلته بهالحر حق وحده نفسي اتنشف الريج و كله اتسأل اقولها بخمسين دينار"

و عطيته المقسوم و مشيت


تررننن تررررن ولا اخوي ايدق، طلع لسان الدلاله و قمت اعاتبه وينكم عني و سيارتي و مادري شنو، قالي وينج ، قلت لا خلاص صلحته انا عند البنشر قالي زين دبرتي عمرج و شنو سوا ،، و سردت له ما ذكر اعلاه

و طبعا انصدمت اني لما قلت لاخوي السعر عرف انه سوا لي رقعه و حط تيوب! قالي لييش انتي اصلا تواير سيتارتج تييوب لس ما يحط لج تيوب قلت امبلا اهو قالي؟! سالني بجم قلت ٧٥٠ قالي اييي لا حط تيوب لان الرقعه بربع و التيوب بنص! انا قمت اتذكر روحي لما تخيلت ان هالاشياء اتكلف ،، الجهل شين

14 comments:

Purgatory said...

More expensive that a Bo6a6 and falafel sandwich.

LiL ALiEN said...

بما انج خبره الحين وعرفتي القمنده .. شرايج تاخذين سيارتي وتبدلين ال 4 تواير .. وتتعلمين تغيرين السفايف مره وحده؟

:P

غريب said...

خطاك السو
بس يتراوالي خوش خبره

3baid said...

LOOOL!

Mashallah 3alaich Chill Girl it3arfeen itti9arrifain, I'm so proud of you! :D

It was a good learning experience mo? :]

EXzombie said...

اكزومبي ماخذ كلاش و وده يطشر الكل

بعدين حلوة القصة اول مرة تكتبين شي و اضحك منه، التدريب نفع معاج اخيرا

Mr_CHoCoLaTe said...

هههههههههههه

مشكله المسامير اللي بالشارع

انا مره برغي دش بتايري

مسكين هالتيار اهو الوحيد اللي يدشون فيه اشياء

و السبير يستخدم للحالات الطارئه ما يصير تخلينه تاير اساسي

حتى لو مثلاً عندج تاير انبط

تحطين السبير و بعدين تبدلين التواير كلهم لازم

لان في سبيرات حاطينهم مؤقته يعني بس سرعة 80 كيلو يتحمل

سئلي اخوج يشرح لج احسن هي هي

خطاج السو

باي

Purplecious said...

LOOOOOOOOOOOL

بدعتي بس عفيه عليج تعجبيني طلعتي قدعه و رياله

كفوووووو
:*

Q80-Chill Girl said...

Purgatory
LOL
its around 7 and a half sandwiches

LiL Alien
خاين! بعلم شروق
انت ما عندك مركبة فضائية؟
شلون تبي تواير؟
@@ انت مو ايلين

غريب

خطاك اللاش
خوش خبره بس الحر مو شي :>

3baid

lol
thank you all of a sudden im shy lol :D yes it was

EXzombie

عساك دوم مستانس

و اي تدريب؟ قصدك الاحباط لما تقول انتوا البنات ماتعرفون اتنكتون
:/

هذي احدى مواهبي الخفية اللي ماتدري عنها :>

Mr_Chocolate

اي ان شاء الله ببدلهم كلهم و حتى السبير مابيه عوع ،، الروح غاليه و انا وخيتك و اشوه الله ستر اني بمنطقه مو على الخط السريع! ما كنت دايسه ولا جان علوووم

Purplecious

استحيت مره ثانيه بعد مستحاتي مع عبيد :>

:*

افا عليج اظبطج و ما خفي كان اعظم، ما احب اصير البنية اللي تكسر الخاطر و ما اتدبر عمرها

BB said...

plz check the tagging tree >> http://8thofaugust.blogspot.com/2008/06/tagging-tree.html

Q80-Chill Girl said...

BB

thx for stopping by and telling me about ur tree hunt ;p

الزين said...

عفية عليج

انا اعتقد لو تبنجر سيارتي اتوهق

بس طلعتي شاطره اسم الله عليج

تصدقين تفاجأت بالسعر

بس 750

@@

يا بلاش

Q80-Chill Girl said...

الزين

هذا اللي بهرني بالموضوع انه ب٧٥٠ فلس بسسس

لوول

Admin said...

hehe, it was an interesting story. People learn from life. ;-)

Q80-Chill Girl said...

Admin

:D yep!