أيطالين - القصة خلف الصورة

و في عصرونيه بمدينة الرياض و انا مع فلك وولد خالتنا الثاني كنا نفتر و نخلص اشغال و اشتهيت اني اشرب موكا، و ايكون مستحيه من ولد خالتي الثاني و مابي اعنيه قلت له اي مكان ما يهم و ما تشرطت و تمشي فينا السيارة لين وصلنا لمقهى اسمه
Tutti Cafe - انواع القهوة

*ماعندي فكره شنو علاقة الترجمة بالاسم العربي؟!*

و كان الهندي واقف بشكل سينمائي حيث اتكئت رجله اليمين على نهاية العمود الصغير و كوع يده اليمين متقاطع مع يده اليسار و هم الاثنين متكئين على ركبته اليمين و بنظرة لامبالاه قام بالالتفات للسيارة عندما وقفت

فلك: شلون الحين انزل ولا اطلب المنيو؟
ولد خالتنا الطيب اللي كرفناه [وخطك] : لا اطلب المنيو من الهندي ذا
فلك: انت شنو عندك؟
الهندي بعد ما استعدل و جا صوب الدريشه: في كول شي
فلك: اكو منيو؟ جيب منيو

ووصلت المنيو

و خلال المباحثات عيني طاحت على أيطالين و فصلنا انا و فلك على الترجمه! وولد خالتنا [وخطك] يبتسم مو مستوعب اننا ككويتيين لقينا لنا كنز و اي شي يستدعي مهارات الشماته عندنا يكون جدا مقدر

المراااااااد قلنا خل نشوف شعنده

فلك: انزين اخوي كبتشينو اسبشل شنو فيه؟
الهندي: هذا كبتشينو ايسبيسال
فلك: اي يعني شنو فيه؟ شنو معاه؟
الهندي: هااا، هدا في ماااارس ميللو
انا بكل لقافه: هههه! لا مابي مارس ملو، عفيه سأله عن الأيطالين

اهنيه انا وفلك نبي نقزرها عليه

فلك: هذا ايطالين شنو فيه؟
الهندي: هدا طوعم غيير
فلك - بدا يفصل-: اي شنو فيه ؟؟؟؟؟
الهندي: هدا في فونيلا
انا - غامته الظحكة-: انزين سئله عن المكسكن
فلك: و هذا مكسكن شنو فيه؟
الهندي: بابا هدا كمان غير، انت اشرب انت عرف

فلك: هههههههههههههههههه

طلعت ضحكة المارد من فلك و خلاص ما كو مجال يغمتها، و انا وولد خالتنا فصلنا

فلك و اهو يكعكع: هاك اخذ المنيو خلاص مانبي شي مشكور

الهندي: ليش انت مايبي؟

فلك يكمل ظحكة المارد

و مشينا و لقينا دنكن و رجع الوضع لطبيعته بس هم ما لقينا موكا