23 : النوير كويتي؟

احلى شي بهالفترة بالكويت النوير! بعد كل مطرة اصير ادوره دواره بالشوارع، لان هالوردة تعجبني حيل :) مع اني ما احب اللون الاصفر و ينرفزني! مادري ليش، بس هالوردة تسحرني و تحسسني ان الكويت احلى! احسها تزين الكويت. و جربوا اتلفتون يمين و يسار بتلقونها بكل مكان، و احلى شي انها تطلع بكل مكان و قاعده تنافس الاسفلت و الكونكريت علشان تطلع و تخليني ابتسم
:)

و سرحت قمت افكر، على طاري الهبة الاخيرة بالمجادلة بموضوع الوطنية و اصل الكويتيين و منو كويتي و منو مو كويتي، قمت افكر النويرة كويتية؟ انزين اهي تطلع بكل مكان بالعالم اهي ينقال لها ديزي و عايلتها كبيرة و ممتدة!؟ فهل اهي اصيلة ولا بيسرية؟ سنية ولا شيعية؟ حضرية ولا بدوية؟ خاصة انها تطلع بالبر و هم صوب البحر و بالمدن و المناطق العادية!! انزين جنسيتها اولى ولا ثانية ولا ...الخ؟ و لو كانت اولى اهي تأسيس ولا تجنيس؟

على كثر ما تحسون هالاسئلة حول النويرة مالها داعي، اللي صار كان ماله داعي. لسبب بسيط واحد، شنو النهاية؟ هالوردة الحين موجودة و قاعدة تسعدنا و تزين دولتنا، ليش انناشبها؟ و منو احنا علشان نقولها قومي من مكانج و اهي الله حطها بهالمكان؟ ما اجادل بموضوع الإلهاء المستخدم "الازدواجية بالجنسية! فكل اشكالها مرفوضة بالنسبة لي" و لكني اجادل بخلط الاوراق و اللعب بالمشاعر و الكلمات والمواقف بشكل شنيع. المفروض تبقى الوردة "كل كويتي" و نسعى لانها تبقى و تتعايش بسلام مع طبيعة الكويت و التحديات اللي حولها، فلو كنا نحب الكويت فعلا لاصبحنا زهور تزينها، لا اشواك تنهش بجسدها. العقلانية بمعالجة الامور تنقصنا، و الجدال العقيم لن ينفعنا. ليش هالكلام الحي؟! بس! طرى ببالي، و لاني اعتقد ان الموضوع طخ بس ما انتهى، و اتمنى ينتهي على خير